काठमाडौं | असार २३, आकर्षक तलबसहित वैदेशिक रोजगारीमा विभिन्न देश पठाइदिने प्रलोभन देखाएर लाखौं रुपैयाँ ठगी गरेको आरोपमा सात जनालाई प्रहरीले पक्राउ गरेको छ ।

काठमाडौं उपत्यका अपराध अनुसन्धान कार्यालय, टेकुले पीडितहरूको उजुरीका आधारमा पक्राउ परेका सात जनालाई थप अनुसन्धान तथा कारबाहीका लागि वैदेशिक रोजगार विभाग, ताहाचल पठाएको जनाएको छ ।

पक्राउ पर्नेहरूमा झापा घर भई काठमाडौं-२६ बस्ने टिका कार्की (४८), सुनसरी घर भई काठमाडौं-१६ बस्ने सरिता बान्तवा राई (४६), नुवाकोट घर भई टोखा-६ बस्ने अग्रीम बिक्रम तिमोथी (२५), धादिङ घर भई काठमाडौं-१५ बस्ने दिपक चन्द्र गौतम (४९), मोरङ घर भई काठमाडौं-२६ बस्ने धनप्रसाद काफ्ले (४४), रूपन्देही घर भई काठमाडौं-११ बस्ने रूपा सुनार (४०) तथा जुम्ला घर भई भक्तपुर मध्यपुरथिमी-४ बस्ने रमेश स्वाँर (२९) रहेका छन ।

प्रहरीका अनुसार टिकाले साइप्रस पठाइदिने भन्दै ५० हजार रुपैयाँ, सरिताले अष्ट्रेलिया पठाइदिने भन्दै ३० लाख रुपैयाँ, अग्रीम बिक्रमले दक्षिण अफ्रिका पठाइदिने भन्दै ६ लाख ८५ हजार रुपैयाँ, दिपक चन्द्रले ग्रिस पठाइदिने भन्दै तीन जनाबाट ७ लाख ९४ हजार रुपैयाँ, धनप्रसादले यूएई पठाइदिने भन्दै ८० हजार रुपैयाँ, रूपाले पोर्चुगल पठाइदिने भन्दै तीन जनाबाट २१ लाख रुपैयाँ तथा रमेशले बेलायत (युके) पठाइदिने भन्दै ६ लाख रुपैयाँ असुलेर सम्पर्कविहीन भएको आरोप छ ।

यसरी उनीहरूले विभिन्न पीडितबाट कुल ६६ लाख ९ हजार रुपैयाँ ठगी गरेको प्रारम्भिक अनुसन्धानबाट खुलेको प्रहरीले जनाएको छ ।

प्रहरीले वैदेशिक रोजगारीका नाममा हुने ठगीबाट जोगिन आधिकारिक म्यानपावर कम्पनी र वैदेशिक रोजगार विभागबाट आवश्यक जानकारी लिएर मात्र प्रक्रिया अघि बढाउन सर्वसाधारणलाई आग्रह गरेको छ ।