कोहलपुर, बाँके — प्रतिनिधि सभा सदस्यका लागि बाँके क्षेत्र नं. १ मा चुनावी गतिविधि दिनप्रतिदिन तीव्र बन्दै गएको छ । यसैक्रममा उम्मेदवार सूर्य ढकाल मतदाताकाे नजरमा काे हुन भन्ने  उद्देश्यले “जन संवाद” कार्यक्रम सम्पन्न भएकाे छ । कार्यक्रम संचार यात्रा प्रा. ली. को आयोजनामा २०८२ फागुन १३ गते बिहान ८:०० बजे होटल सुनाखरी मा सम्पन्न भएको हो।

कार्यक्रममा स्थानीय बुद्धिजीवी, व्यवसायी, युवा, महिला तथा सर्वसाधारणको उल्लेखनीय उपस्थिति रहेको थियो । सहभागी मतदातासँग उम्मेदवार ढकालप्रति जनताको धारणा, अपेक्षा र सुझावका विषयमा खुला छलफल गरिएको थियो ।

जनताको भावना: “सादगी र पहुँचयोग्य नेता”

उपस्थित अधिकांश मतदाताले सूर्य ढकाललाई सादगी, सरल र जनताको भावना बुझ्ने नेताका रूपमा चित्रित गरे । “हामीलाई ठूला आश्वासनभन्दा व्यवहारिक काम चाहिएको छ,” एक स्थानीय युवाले भने, ढकालज्यूले गाउँटोलमै आएर कुरा सुन्नु भएको छ, त्यसैले उहाँप्रति भरोसा बढेको छ ।

केही व्यवसायीले स्थानीय स्तरमा रोजगारी सिर्जना र साना तथा मझौला उद्यम प्रवर्द्धनमा स्पष्ट योजना ल्याउन आग्रह गरे । कृषकहरूले कृषि उत्पादनको उचित मूल्य, सिँचाइ सुविधा र बजार व्यवस्थापनमा ध्यान दिनुपर्ने धारणा राखे ।

महिला सहभागीहरूले शिक्षा, स्वास्थ्य र महिला सशक्तीकरणका कार्यक्रमलाई प्राथमिकतामा राख्न सुझाव दिएका थिए । स्वास्थ्य सेवा सहज र गुणस्तरीय हुनुपर्छ, ग्रामीण क्षेत्रमा अझै पहुँचको समस्या छ, एक महिला सहभागीले बताइन् ।

विकास र रोजगारी मुख्य एजेन्डा

कार्यक्रममा ढकालले स्थानीय तहमा दिगो विकास, रोजगारी सिर्जना, कृषि आधुनिकीकरण, गुणस्तरीय शिक्षा तथा स्वास्थ्य सेवामा सुधारलाई आफ्नो मुख्य चुनावी एजेन्डा बनाएको उल्लेख गरिएको थियो । उपस्थित स्थानीयहरूले यी एजेन्डा कार्यान्वयन गर्न सक्ने क्षमता ढकालसँग रहेको विश्वास व्यक्त गरेका छन् ।

चुनाव नजिकिँदै जाँदा घरदैलो अभियान, भेटघाट तथा छलफल कार्यक्रमलाई तीव्रता दिइरहेका ढकाल मतदातासँग प्रत्यक्ष संवादमार्फत आफ्नो पक्षमा समर्थन जुटाउने रणनीतिमा केन्द्रित देखिन्छन् ।

प्रतिस्पर्धा रोचक बन्दै

बाँके क्षेत्र नं. १ मा विभिन्न राजनीतिक दलका उम्मेदवारहरू सक्रिय रहेकाले चुनावी प्रतिस्पर्धा रोचक बन्दै गएको छ । यद्यपि, मतदाताको भावना बुझ्न र प्रत्यक्ष संवादमार्फत विश्वास जित्न खोजिएको यो कार्यक्रमले चुनावी माहोललाई थप चलायमान बनाएको स्थानीयहरूको भनाइ छ ।

समग्रमा, ‘जन संवाद’ कार्यक्रमले मतदाताको अपेक्षा, असन्तुष्टि र आशालाई सार्वजनिक रूपमा अभिव्यक्त गर्ने मंच प्रदान गरेको देखिएको छ । चुनावी सरगर्मी बढ्दै जाँदा यस्ता संवाद कार्यक्रमहरूले मतदाताको निर्णय प्रक्रियामा महत्त्वपूर्ण भूमिका खेल्ने विश्लेषकहरूको धारणा छ ।