कोहलपुर । कोहलपुरमा आयोजना हुन लागेको कोहलपुर महोत्सवको सम्पूर्ण भौतिक, व्यवस्थापकीय तथा सुरक्षा तयारी अन्तिम चरणमा पुगेको आयोजकले जनाएको छ । मंगलबार आयोजित पत्रकार सम्मेलनमार्फत कोहलपुर उद्योग वाणिज्य संघले महोत्सव अवलोकनका लागि टिकट दर, सुरक्षा व्यवस्था र उद्देश्यबारे विस्तृत जानकारी दिएको हो ।
आयोजकका अनुसार महोत्सव अवलोकनका लागि सामान्य टिकट रु. १०० र सहुलियत टिकट रु. ८० निर्धारण गरिएको छ । शारीरिक रूपमा अपाङ्गता भएका व्यक्तिहरू तथा ७० वर्षमाथिका ज्येष्ठ नागरिकलाई निःशुल्क प्रवेशको व्यवस्था गरिएको छ । सञ्चारकर्मीहरूलाई प्रेस कार्डका आधारमा प्रवेश दिइने जनाइएको छ ।
दर्शक सुरक्षालाई प्राथमिकतामा राख्दै महोत्सव स्थलमा सीसी क्यामेरा निगरानी, प्रशिक्षित सुरक्षा गार्ड, स्वास्थ्य सहायता कक्ष, आगलागी नियन्त्रण उपकरण, ट्राफिक तथा पार्किङ व्यवस्थापनसहित सम्पूर्ण सुरक्षा प्रबन्ध मिलाइएको आयोजकले दाबी गरेको छ ।
पत्रकार सम्मेलनमा बोल्दै आयोजक मुल समितिका संयोजक भट्टराईले महोत्सवलाई कोहलपुर क्षेत्रको आर्थिक, सामाजिक, सांस्कृतिक र पर्यटन विकासको साझा अभियानका रूपमा सञ्चालन गर्न लागिएको बताए । स्थानीय उत्पादन, व्यापार, कला–संस्कृति र रोजगारी प्रवर्द्धनमा महोत्सवले महत्वपूर्ण भूमिका खेल्ने उनको भनाइ छ ।
हालसम्म महोत्सवलाई लिएर फैलाइएका भ्रम, अफवाह तथा भ्रामक प्रचारप्रति ध्यान नदिन आयोजक समितिले आग्रह गरेको छ । महोत्सवलाई सम्पूर्ण नगरवासीको साझा पर्वका रूपमा सफल बनाउन स्थानीय सरकार, व्यापारी, समाज र नागरिक सबैको सहयोग, समन्वय र सहभागिता आवश्यक रहेको उल्लेख गर्दै संयोजक भट्टराईले महोत्सवलाई “आफ्नै उत्सव”का रूपमा अपनत्व प्रदान गर्न नगरवासीलाई आह्वान गरे ।
पत्रकार सम्मेलनमा महोत्सव सञ्चालनमा देखिँदै आएको विवादबारे पनि चर्चा गरिएको थियो । आयोजकले देशैभरि महोत्सव हुने गरे पनि पाल्पा र कोहलपुरमा मात्र महोत्सव सञ्चालन विवादित बन्नुका पछाडि स्थानीय सरकारले प्रतिनिधिमूलक संस्था बाहेक अन्य संगठनलाई मेला–महोत्सव सञ्चालनको अनुमति दिनु मुख्य कारण रहेको बताएका छन् । यसले स्थानीय व्यापारी, व्यवसायी र समाजमा असमझदारी पैदा गर्ने गरेको आयोजकको ठहर छ ।
आगामी दिनमा यस्तो समस्या दोहोरिन नदिन देशैभरि उद्योग वाणिज्य संघले महोत्सव सञ्चालन गरेजस्तै कोहलपुरमा पनि यही संस्थाअन्तर्गत मात्र महोत्सव सञ्चालन हुने गरी नीति निर्माणका लागि स्थानीय सरकारसँग पहल गर्ने आयोजकको भनाइ छ ।
समग्रमा, विवादका बीच पनि आयोजकले व्यवस्थापन, सुरक्षा र समन्वयलाई प्राथमिकतामा राख्दै महोत्सवलाई सफल बनाउन तयारी तीव्र पारेको देखिन्छ । अब महोत्सवलाई विवादभन्दा माथि उठाएर साझा उत्सवका रूपमा रूपान्तरण गर्न स्थानीय सरकार, व्यापारी र समाजको निर्णायक भूमिका रहने अध्यक्ष भट्टराईले बताए ।