ललितपुरमा एक युवतीमाथि सार्वजनिक स्थानमा अशोभनीय तथा अश्लील व्यवहार गरेको आरोपमा प्रहरीले एक पुरुषलाई पक्राउ गरेको छ ।

जिल्ला प्रहरी परिसर ललितपुरले इमाडोल क्षेत्रमा बस्दै आएका ५५ वर्षीय सुरेन्द्र भट्टलाई पक्राउ गरेको जनाएको छ । उनी मुलतः बैतडीका बासिन्दा हुन् र शिक्षा क्षेत्रमा कार्यरत सरकारी कर्मचारी रहेको प्रहरीले जनाएको छ ।

प्रहरीका अनुसार आइतबार इमाडोल क्षेत्रमा बाटो हिँडिरहेकी एक युवतीलाई पछ्याउँदै अश्लील हर्कत गरेको आरोप भट्टमाथि लागेको छ । घटनाको क्रममा पीडित युवतीले आफ्नो मोबाइलबाट भिडियो रेकर्ड गरेकी थिइन ।

उक्त भिडियो सामाजिक सञ्जालमा सार्वजनिक भएपछि घटना व्यापक रूपमा चर्चामा आएको थियो । त्यसपछि प्रहरीले भिडियोका आधारमा व्यक्तिको पहिचान गरी नियन्त्रणमा लिएको जनाएको छ ।

घटनापछि पीडित युवती पनि प्रहरीको सम्पर्कमा पुगेकी छन । जिल्ला प्रहरी परिसर ललितपुरका एसपी गौतम मिश्रका अनुसार पक्राउ परेका भट्टमाथि सम्बन्धित कानुनी व्यवस्था अनुसार थप अनुसन्धान भइरहेको छ ।