काेहलपुर, बाँके। लामो समयदेखि वर्षा नहुँदा आकाशतिर हेरेर बस्न बाध्य भएका बाँकेका किसानले धान रोपाइँको मुख्य समयमा परेको वर्षापछि राहतको सास फेरेका छन । केही दिनअघिसम्म सिँचाइको अभावमा खेतमा पानी नहुँदा रोपाइँ प्रभावित भएको थियो । कतिपय किसानले महँगो खर्च गरेर मोटरबाट पानी तानेर रोपाइँ गरिरहेका थिए भने धेरै किसान वर्षाको प्रतीक्षामै थिए ।

हाल परेको वर्षाले खेतमा पर्याप्त पानी जम्न थालेपछि रोपाइँ कार्यले गति लिएको छ । किसानका अनुसार समयमै पानी परेकाले धान रोप्न सहज भएको छ र उत्पादनमा समेत सकारात्मक प्रभाव पर्ने अपेक्षा गरिएको छ। लामो खडेरीका कारण बढेको चिन्ता वर्षापछि केही हदसम्म कम भएको उनीहरूको भनाइ छ ।

यद्यपि, यही वर्षाले जिल्लाका विभिन्न शहरी तथा बजार क्षेत्रमा भने समस्या निम्त्याएको छ । फितलो सडक निर्माण, प्रभावकारी नाली व्यवस्थापनको अभाव तथा ढल निकास अवरुद्ध हुँदा सामान्य वर्षामै सडकमा पानी जमेको छ । विशेषगरी नेपालगञ्जका विभिन्न चोक, बजार क्षेत्र तथा भित्री सडकहरू जलमग्न हुँदा पैदलयात्री, साइकल तथा मोटरसाइकल चालकलाई आवतजावत गर्न कठिनाइ भएको छ ।

सडकमा जमेको पानीका कारण सवारीसाधन सञ्चालनमा समेत समस्या देखिएको छ। कतिपय स्थानमा सडक नै पोखरीजस्तै बनेपछि यात्रुहरू जोखिम मोलेर यात्रा गर्न बाध्य भएका छन । पानी निकासको उचित व्यवस्था नहुँदा वर्षेनी दोहोरिने समस्या समाधान हुन नसकेको भन्दै स्थानीयवासीले सम्बन्धित निकायप्रति गुनासो गरेका छन ।

स्थानीयका अनुसार सडक निर्माणसँगै गुणस्तरीय नाली निर्माण र नियमित सरसफाइमा ध्यान नदिँदा सामान्य वर्षामै सडक डुबान हुने अवस्था सिर्जना भएको हो। उनीहरूले वर्षायाम सुरु भएसँगै यस्ता समस्याको दीर्घकालीन समाधानका लागि स्थानीय सरकार र सम्बन्धित निकायले प्रभावकारी योजना लागू गर्नुपर्ने माग गरेका छन ।

कृषि क्षेत्रका लागि वर्षा वरदान सावित भए पनि शहरी पूर्वाधारको कमजोरीका कारण सर्वसाधारणले सास्ती खेप्नुपरेको देखिएको छ । एकातिर किसानको अनुहारमा खुसी छाएको छ भने अर्कोतर्फ सडक जलमग्न हुँदा दैनिक जनजीवन प्रभावित बनेको छ ।