काठमाडौं, असार ४ – आफूलाई ई-सेवाको कर्मचारी भनेर चिनाउँदै सर्वसाधारणलाई ठगी गर्ने आरोपमा रौतहटको माधव नारायण नगरपालिका-२ निवासी २२ वर्षीय शुभम साह पक्राउ परेका छन्।
प्रहरीको साइबर ब्यूरो, भोटाहिटीबाट खटिएको टोलीले मंगलबार साहलाई पक्राउ गरेको हो। प्रारम्भिक अनुसन्धानका क्रममा उनले ई-सेवाबाट फोन गरेको भन्दै एक सेवाग्राहीलाई सम्पर्क गरी “तपाईंको ई-सेवामा धेरै रिवार्ड पोइन्ट छ, किन प्रयोग नगर्नुभएको?” भन्दै विश्वासमा पारेका थिए।
प्रहरीका अनुसार उनले फोनमार्फत ओटीपी (OTP) कोड प्राप्त गरी पीडितको खाताबाट १ लाख ९८ हजार ४ सय ९९ रुपैयाँ रकम ईभोलुसोन ट्रेडिङ प्रालिको ई–सेवा आईडी मा स्थानान्तरण गरेका थिए। उक्त रकम प्रयोग गरी उनले आइफोन खरिद गरेको पनि अनुसन्धानबाट खुलेको छ।
पक्राउ परेका साहको साथबाट प्रहरीले चार थान मोबाइल फोन र चार थान सिमकार्ड बरामद गरेको जनाएको छ।
यस घटनामा थप अनुसन्धानका लागि जिल्ला अदालत काठमाडौंबाट चार दिनको म्याद थप अनुमति लिइएको र आवश्यक अनुसन्धान जारी रहेको प्रहरीले जनाएको छ।
साइबर ब्यूरोले सर्वसाधारणलाई ओटीपी, पासवर्ड तथा व्यक्तिगत बैंकिङ विवरण कसैलाई पनि नदिन आग्रह गरेको छ।
