धनगढी । कैलालीका विभिन्न स्थानबाट प्रहरीले खैरो हेरोइन र चरेससहित तीन जनालाई पक्राउ गरेको छ ।
इलाका प्रहरी कार्यालय लम्कीबाट खटिएको प्रहरी टोलीले लम्कीचुहा नगरपालिका-४ बलियाका २१ वर्षीय उज्जल चौधरीलाई अवैध लागूऔषध खैरो हेरोइन जस्तो देखिने पदार्थ ३ ग्राम ७ सय मिलिग्राम सहित बिहीबार साँझ पक्राउ गरेको हो । प्रहरीले उनको घरमा तलासी गर्दा उक्त पदार्थ बरामद गरेको जनाएको छ ।
त्यसैगरी, लागुऔषध नियन्त्रण ब्युरो शाखा कार्यालय धनगढी र प्रहरीको संयुक्त टोलीले गोदावरी नगरपालिका-९ निवासी ३५ वर्षीया पार्वती गुरधामीलाई १ सय ७२ ग्राम ९३ मिलिग्राम चरेस जस्तो देखिने पदार्थसहित बिहीबार दिउँसो पक्राउ गरेको छ। उनको घरमा गरिएको खानतलासीका क्रममा उक्त लागूऔषध फेला परेको प्रहरीले जनाएको छ ।
यस्तै, लम्कीचुहा नगरपालिका-४ बलियाकै २३ वर्षीय अमित चौधरीलाई २ सय १० मिलिग्राम खैरो हेरोइन जस्तो देखिने पदार्थसहित बिहीबार साँझ पक्राउ गरिएको छ। इलाका प्रहरी कार्यालय लम्कीबाट खटिएको टोलीले उनलाई नियन्त्रणमा लिएको हो ।
पक्राउ परेका तीनै जनामाथि लागुऔषध सम्बन्धी कसुरमा आवश्यक अनुसन्धान भइरहेको प्रहरीले जनाएको छ ।
प्रतिक्रिया
सम्बन्धित खवर
