लुम्बिनी प्रदेशको परासी जिल्लामा आजदेखि सुरु भएको वाइवाइ अन्डर-१९ महिला क्रिकेट प्रादेशिक छनोट प्रतियोगितामा बाँकेले विजयी सुरुवात गरेको छ । पहिलोपटक परासीमा आयोजना भएको प्रतियोगिताबाट छनोट हुने खेलाडीहरूले लुम्बिनी प्रदेशको प्रतिनिधित्व गर्दै सुर्खेतमा हुने राष्ट्रिय अन्डर-१९ क्रिकेट प्रतियोगितामा सहभागिता जनाउनेछन।
कपिलवस्तुले टस जितेर पहिले फिल्डिङ रोजेको खेलमा बाँकेले निर्धारित २० ओभरमा केवल २ विकेट गुमाउँदै २४८ रनको विशाल योगफल तयार पारेको थियो । बाँकेको ब्याटिङमा पूर्णिमा डाङ्गीले अविजित ८३ रनको शानदार इनिङ खेलिन् भने आसीका भट्टराईले नटआउट ५१ रन बनाइन भने मुना बुढा मगरले १९ रनको योगदान दिइन।
२४९ रनको कठिन लक्ष्य पछ्याएको कपिलवस्तु ८.१ ओभरमै सबै विकेट गुमाउँदै ३२ रनमा समेटियो । बाँकेले २१६ रनको फराकिलो अन्तरले पहिलो खेल आफ्नो पक्षमा पार्न सफल भयो ।
उत्कृष्ट प्रदर्शन गरेकी पूर्णिमा डाङ्गी प्लेयर अफ द म्याच घोषित भइन।
प्रतियोगिताअन्तर्गत जेठ १४ गते बाँके र बर्दियाबीच प्रतिस्पर्धा हुनेछ । बाँकेको टोलीमा कप्तान सुरक्षा पुन मगर रहेकी छन् भने प्रशिक्षक जमिन अन्सारी, सहायक प्रशिक्षक ममता थापा र टिम व्यवस्थापक दीपक केसी रहेका छन् ।
अन्डर-१९ महिला क्रिकेट प्रादेशिक छनोट प्रतियोगिता जेठ १२ गतेदेखि १७ गतेसम्म सञ्चालन हुनेछ ।