काठमाडौं, ४ वैशाख २०८३ – वैदेशिक रोजगारीमा आकर्षक तलबको प्रलोभन देखाएर विभिन्न देश पठाइदिने भन्दै ठगी गर्ने चार जनालाई प्रहरीले पक्राउ गरेको छ ।
पक्राउ पर्नेहरूमा काठमाडौं महानगरपालिका-३२ बस्ने रौतहटका २९ वर्षीय अनन्त कोईराला, गोकर्णेश्वर नगरपालिका-५ बस्ने इलामका ४७ वर्षीय जगत बहादुर खड्का, काठमाडौं महानगरपालिका-२६ बस्ने तारकेश्वर नगरपालिका-६ का ५४ वर्षीय ज्ञानु श्रेष्ठ र भक्तपुर नगरपालिका-१५ बस्ने रामेछापका २२ वर्षीय बिकास श्रेष्ठ रहेका छन ।
प्रहरीका अनुसार, अनन्त कोईरालाले फिनल्याण्ड पठाइदिने भन्दै एक जना पीडितबाट ३१ लाख १५ हजार ८७ रुपैयाँ ठगी गरेका थिए । त्यसैगरी, जगत बहादुर खड्काले कतार पठाइदिने भन्दै १ लाख ३९ हजार रुपैयाँ, ज्ञानु श्रेष्ठले युएई पठाइदिने भन्दै ३ लाख रुपैयाँ र बिकास श्रेष्ठले साइप्रस पठाइदिने भन्दै ९ लाख रुपैयाँ लिई सम्पर्कविहीन भएका थिए ।
पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनीहरूलाई विभिन्न स्थानबाट पक्राउ गरेको हो । प्रहरीले बुधबार जगतलाई काठमाडौं महानगरपालिका-३ बाट पक्राउ गरेको थियो भने बिहीबार अनन्तलाई काठमाडौं महानगरपालिका-२९, ज्ञानुलाई काठमाडौं महानगरपालिका-२६ र बिकासलाई भक्तपुर नगरपालिका-१० बाट पक्राउ गरिएको हो ।
पक्राउ परेका अनन्त कोईरालालाई थप अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ। अन्य तीन जना-जगत बहादुर खड्का, ज्ञानु श्रेष्ठ र बिकास श्रेष्ठलाई वैदेशिक रोजगार विभाग, ताहाचल पठाइएको प्रहरीले जनाएको छ ।
प्रहरीले वैदेशिक रोजगारीका नाममा हुने ठगीबाट सतर्क रहन र आधिकारिक निकायमार्फत मात्र प्रक्रिया अघि बढाउन सर्वसाधारणलाई अनुरोध गरेको छ ।
