काठमाण्डाै, बैशाख २- सभामुख डोलप्रसाद अर्याल सवार गाडीलाई ट्राफिक प्रहरीले कारबाही गरेपछि “कानुन सबैका लागि समान” भन्ने सन्देश फेरि एकपटक पुष्टि भएको छ । बुधबार थापाथली क्षेत्रमा लेन उल्लंघन गरेको आरोपमा सभामुखको गाडीसहित अगाडि-पछि रहेका सवारी साधनलाई ट्राफिक प्रहरीले रोकेर कारबाही गरेको हो । स्रोतका अनुसार नियम मिचिएपछि ट्राफिक प्रहरीले सिधै सिंहदरबार पुगेर तीन वटा गाडीलाई चिट काटेकाे थियो ।
यो घटनाले उच्च पदस्थ व्यक्तिका सवारी साधनसमेत ट्राफिक नियम उल्लंघन गरे कारबाहीबाट अछुतो नरहने संकेत दिएको छ । सर्वसाधारणले लामो समयदेखि उठाउँदै आएको “विशेष सवारीलाई छुट” भन्ने गुनासोका बीच यस्तो कदमलाई सकारात्मक रूपमा हेरिएको छ ।
सभामुखका स्वकीय सचिव नवराज पाण्डेले भने चालक परिवर्तनका कारण घटना भएको स्पष्ट पारेका छन । उनका अनुसार यसअघि नै चालकहरूलाई ट्राफिक नियम कडाइका साथ पालना गर्न निर्देशन दिइएको थियो ।
यस घटनाले राजधानीमा ट्राफिक अनुशासन कार्यान्वयन कत्तिको प्रभावकारी बन्दैछ भन्ने प्रश्नसँगै नियम पालनामा सबै पक्ष जिम्मेवार हुनुपर्ने सन्देश दिएको छ ।
