काठमाडौं, चैत २२ — लामो समयदेखि रोकिएको मतदाता नामावली संकलनको काम आजदेखि पुनः सुरु भएको छ । प्रतिनिधिसभा सदस्य निर्वाचनको तयारीका कारण गत मंसिरदेखि स्थगित गरिएको यो प्रक्रिया पुनः सञ्चालनमा ल्याइएको हो ।
निर्वाचन आयोगको चैत १८ गतेको निर्णयअनुसार अब नागरिकहरूले आफ्नो विवरण अद्यावधिक गर्न र नयाँ नाम दर्ता गर्न सक्ने भएका छन । विशेषगरी राष्ट्रिय परिचयपत्र प्राप्त नागरिकहरूले अनलाइनमार्फतै सजिलै नामावलीमा समावेश हुन सक्ने व्यवस्था मिलाइएको छ ।
जसले राष्ट्रिय परिचयपत्र बनाइसकेका छैनन्, उनीहरूले ‘प्रि-इनरोलमेन्ट’ प्रणाली प्रयोग गरेर अनलाइन फारम भर्नुपर्नेछ । त्यसपछि फोटो र औंठाछापसहितको जैविक विवरण दिन सम्बन्धित निर्वाचन कार्यालयमा व्यक्तिगत रूपमा उपस्थित हुनुपर्ने व्यवस्था रहेको छ ।
यससँगै मतदाता नामावलीमा भएका त्रुटि सच्याउने, दोहोरो नाम हटाउने, बसाइँसराइ वा मृत्युका विवरण अद्यावधिक गर्ने काम पनि अब अनलाइनबाटै गर्न सकिनेछ। मतदाताले आफ्नो नाम, ठेगाना वा मतदान स्थल पनि आवश्यकताअनुसार परिवर्तन गर्न पाउनेछन ।
आयोगले सबै योग्य नागरिकलाई सक्रिय रूपमा सहभागिता जनाउन आह्वान गर्दै, आफ्नो मतदाता विवरण समयमै अद्यावधिक गर्न अनुरोध गरेको छ ।
