कोहलपुर । यही फागुन २८ गतेदेखि सञ्चालन हुने कोहलपुर प्राइड लिग राष्ट्रिय टि–२० क्रिकेट प्रतियोगिता को तयारी तीव्र रूपमा अगाडि बढाइएको छ । प्रतियोगिताको मिति नजिकिँदै जाँदा आवश्यक पूर्वाधार निर्माणदेखि प्रचार-प्रसारसम्मका कामलाई तीव्र पारिएको आयोजकले जनाएको छ ।

प्रतियोगिताका संयोजक विनायक गिरी का अनुसार कोहलपुरमा पहिलोपटक आयोजना हुन लागेको राष्ट्रियस्तरको टि-२० क्रिकेट प्रतियोगिताका लागि सबै तयारी तीव्र पारिएको हो । उनका अनुसार कोहलपुर–११ स्थित प्रस्तावित अन्तर्राष्ट्रिय क्रिकेट मैदानमा अहिले पिच निर्माण, मैदान व्यवस्थापन र प्रचार-प्रसारको काम धमाधम भइरहेको छ ।

गिरीले क्रिकेटका माध्यमबाट कोहलपुरलाई राष्ट्रिय तथा अन्तर्राष्ट्रिय स्तरमा चिनाउने उद्देश्यसहित प्रतियोगिता सञ्चालन गर्न लागिएको बताए । प्रतियोगितामा राष्ट्रिय क्रिकेट टोलीका खेलाडीहरू विनोद भण्डारी, भिम सार्की र कुशल मल्ल लगायतको सहभागिता रहने जानकारी उनले दिए ।

प्रतियोगितामा ६ वटा क्लबले प्रतिस्पर्धा गर्नेछन् । सहभागी टिमहरूमा युनाइटेड क्लब, कोहलपुर स्पोर्ट एकेडेमी, हिमालयन क्रिकेट एकेडेमी, एस.के. कलेज धनगढी, न्यू होराइजन भैरहवा र ब्राइडल्याण्ड स्कुल रहेका छन् । पाँच दिनसम्म सञ्चालन हुने प्रतियोगितामा प्रत्येक दिन दुई वटा खेल हुने आयोजकले जनाएको छ ।

प्रतियोगिताको विजेताले ४ लाख रुपैयाँ र उपविजेताले २ लाख रुपैयाँ नगद पुरस्कार प्राप्त गर्नेछन्। त्यसैगरी उत्कृष्ट बलर र उत्कृष्ट ब्याटरलाई जनही १०/१० हजार रुपैयाँ पुरस्कार प्रदान गरिनेछ ।

प्रतियोगिताको मुख्य प्रायोजक Campa Beverage रहेको छ भने अन्य सह-प्रायोजकहरू पनि रहने आयोजकले जनाएको छ । प्रतियोगिता सञ्चालनका लागि करिब ३० लाख रुपैयाँ खर्च हुने अनुमान गरिएको छ । प्रतियोगितामा कोहलपुर नगरपालिका संरक्षकको रूपमा रहनेछ ।

प्रतियोगिताको उद्घाटन समारोहमा प्रमुख अतिथिका रूपमा पारस खड्का उपस्थित रहनेछन् । त्यस्तै राष्ट्रिय कलाकार टंक तिमिल्सीना को पनि विशेष प्रस्तुति रहने बताइएको छ । खेल हेर्न आउने दर्शकका लागि कुनै शुल्क नलाग्ने आयोजकले जनाएको छ ।

प्रतियोगिताको आतिथ्यता सिद्धार्थ होटल ले गर्नेछ भने समन्वय बाँके जिल्ला क्रिकेट संघ को रहनेछ । पत्रकार सम्मेलनमा राष्ट्रिय क्रिकेट टोलीका पूर्व कप्तान लेक बहादुर क्षेत्री ले प्रतियोगिताले कोहलपुरको क्रिकेट विकासमा महत्वपूर्ण योगदान पुग्ने विश्वास व्यक्त गरेका थिए ।

यस प्रतियोगिताको मिडिया कोअर्डिनेटर संजय मण्डल रहेका छन् । आयोजकले प्रतियोगितालाई सफल बनाउन तथा खेलाडीहरूलाई हौसला दिन मैदानमै उपस्थित भएर खेल अवलोकन गर्न सबै खेलप्रेमीलाई आग्रह गरेको छ ।