काठमाडौं, कञ्चनपुर, मकवानपुर, कैलाली र सप्तरीका विभिन्न स्थानबाट प्रहरीले लागूऔषधसहित १२ जनालाई पक्राउ गरेको छ । काठमाडौं महानगरपालिका-१४ कलंकी खसिबजारबाट नियन्त्रित लागूऔषध ट्रामाडोल १ सय ट्याब्लेट, स्पास्पेन १ सय ट्याब्लेट, प्रिग्याब्लिन २ सय ट्याब्लेट र टापेन्टाडोल ५० ट्याब्लेटसहित २ जनालाई शनिबार राति पक्राउ गरिएको प्रहरीले जनाएको छ । पक्राउ पर्नेमा काठमाडौं नैकाप बस्ने महोत्तरी घर भएका २८ वर्षीय रूपेश कुमार राउत र रौतहट चन्द्रपुर घर भएका २२ वर्षीय दानिस मगर रहेका छन्। प्रहरी वृत्त कालीमाटीबाट खटिएको टोलीले बा.६० प २४०० नम्बरको मोटरसाइकलमा सवार उनीहरूलाई उक्त लागूऔषधसहित नियन्त्रणमा लिएको हो ।
यस्तै, कञ्चनपुरको भिमदत्त नगरपालिका–२ भासीबाट खैरो हेरोइन जस्तो देखिने पदार्थ १ ग्राम ८ सय १० मिलिग्रामसहित २ जना पक्राउ परेका छन । पक्राउ पर्नेमा बेदकोट नगरपालिका-१ बस्ने २३ वर्षीय बाल चन्द्र धामी र भिमदत्त नगरपालिका-४ बस्ने २१ वर्षीय अभिषेक चन्द रहेका छन । अस्थायी प्रहरी पोष्ट भासीबाट खटिएको प्रहरीले उनीहरूलाई शनिबार राति नियन्त्रणमा लिएको हो ।
यसैगरी कञ्चनपुरकै बेलौरी नगरपालिका-८ खजुवा टोलबाट खैरो हेरोइन जस्तो देखिने पदार्थ ८ ग्राम ९ सय १० मिलिग्रामसहित कृष्णपुर नगरपालिका-२ वाणी बस्ने २६ वर्षीय दिपक भट्ट समेत ३ जनालाई गए राति पक्राउ गरिएको छ । प्रहरी चौकी पचुइबाट खटिएको टोलीले सु.प.प्र. ०१–०१० प ७८८१ नम्बरको मोटरसाइकलमा सवार उनीहरूलाई पक्राउ गरेको हो ।
मकवानपुरको थाहा नगरपालिका-२ अंगारेबाट नियन्त्रित लागूऔषध नाईट्राजेपाम १२ ट्याब्लेट, स्पाईन ३० ट्याब्लेट, ट्रामाडोल ३० ट्याब्लेट, स्ट्यागन १० ट्याब्लेट र नगद ३३ हजार १ सय ९० रुपैयाँसहित थाहा नगरपालिका-२ इन्द्रायणीबस्ती देउलाटोल बस्ने २५ वर्षीय सागर देउला शनिबार दिउँसो पक्राउ परेका छन । इलाका प्रहरी कार्यालय पालुङबाट खटिएको प्रहरीले बा.३१ प ३३३४ नम्बरको मोटरसाइकल चालक देउलालाई नियन्त्रणमा लिएको हो ।
कैलालीको गोदावरी नगरपालिका-९ बल्मीबाट खैरो हेरोइन जस्तो देखिने पदार्थ १ ग्रामसहित गौरीगंगा नगरपालिका-९ बल्मी बस्ने ३२ वर्षीय सञ्जय चौधरीलाई शनिबार राति पक्राउ गरिएको छ । जिल्ला प्रहरी कार्यालय कैलालीबाट खटिएको प्रहरीले उनलाई नियन्त्रणमा लिएको हो ।
यसैगरी सप्तरीको बलान बिहुल गाउँपालिका-२ दिगियाबाट ४५ वर्षीय किशुन देव यादव समेत २ जनालाई करिब ५८ किलो ८ सय ग्राम गाँजा जस्तो देखिने पदार्थसहित गए राति पक्राउ गरिएको छ । जिल्ला प्रहरी कार्यालय सप्तरीबाट खटिएको प्रहरीले किशुनको निर्माणाधीन घरबाट उक्त गाँजा बरामद गरेको जनाएको छ ।
यस सम्बन्धमा प्रहरीले आवश्यक अनुसन्धान भइरहेको जनाएको छ ।
