२९ मंसिर, नेपालगञ्ज । नेपालगञ्जको त्रिभुवन चोक क्षेत्रमा प्रहरीले ठूलो परिमाणको नगदसहित एक व्यवसायीलाई नियन्त्रणमा लिएको छ ।
जिल्ला प्रहरी कार्यालय, बाँकेका अनुसार नेपालगञ्ज उपमहानगरपालिका–११ स्थित त्रिभुवन चोकमा रहेको कुमार जनरल स्टोरका सञ्चालक सुनिलकुमार बानियाँको साथबाट भारतीय रुपैयाँ र नेपाली रुपैयाँ गरी कुल चार लाख ७२ हजारभन्दा बढी रकम बरामद गरिएको हो। बरामद रकममा भारतीय रुपैयाँ ५ सय दरका ६४५ थान, १ सय दरका ५०२ थान तथा नेपाली रुपैयाँ १ हजार दरका १ सय थान रहेका छन्।
प्रहरी नायब उपरीक्षक दीपक पातलीले विशेष सूचनाका आधारमा निगरानी बढाइएका क्रममा उक्त रकम फेला परेको जानकारी दिँदै थप अनुसन्धानका लागि बानियाँलाई राजस्व अनुसन्धान कार्यालय, कोहलपुरमा बुझाउने तयारी भइरहेको बताए। उनका अनुसार बरामद रकमको वास्तविक स्रोत खुल्न बाँकी रहेकाले घटनाबारे विस्तृत छानबिन अघि बढाइएको छ।
स्थानीय बजार क्षेत्रमा नगद कारोबार बढ्दै गएका बेला स्रोत पुष्टि नभएको रकम भेटिनु गम्भीर विषय भएको प्रहरीको भनाइ छ।
