काठमाडौं, २६ चैत – राष्ट्रिय स्वतन्त्र पार्टी (रास्वपा) ले श्रम, रोजगार तथा सामाजिक सुरक्षामन्त्री दीपककुमार साह लाई पदबाट हटाउन प्रधानमन्त्रीसमक्ष सिफारिस गरेको छ । पार्टी सभापति रवि लामिछानेले प्रधानमन्त्री बालेन शाह लाई पत्र लेख्दै मन्त्री साहलाई जिम्मेवारीबाट अलग गर्न आग्रह गरेका हुन ।
पत्रमा पार्टी विधानको धारा २५(४)(क) अनुसार सभापतिलाई पार्टीको आदर्श, सिद्धान्त र मर्यादा जोगाउने जिम्मेवारी रहेको र पदको दुरुपयोग भएको अवस्थामा धारा ६९ अनुसार ‘राइट टु रिकल’ प्रयोग गरी जिम्मेवारीबाट फिर्ता बोलाउन सकिने उल्लेख गरिएको छ ।
रास्वपाले मन्त्री साहले पदीय मर्यादाको दुरुपयोग गर्दै आफ्नी श्रीमतीलाई लामो समयदेखि निष्क्रिय रहेको स्वास्थ्य बिमा बोर्डको सदस्यमा पुनः सक्रिय गराउन चलखेल गरेको आरोप लगाएको छ । उक्त विषयमा पार्टीको केन्द्रीय अनुशासन आयोगले अध्ययन गरी कारबाहीका लागि सिफारिस गरेको थियो ।
आयोगका कार्यवाहक प्रमुख रमाकान्त रिमालले पठाएको सिफारिस पत्रमा मन्त्री साहको कार्य पार्टी विधानको धारा ७१ अन्तर्गत परिवारवाद निषेध सम्बन्धी प्रावधानविपरीत रहेको ठहर गरिएको छ साथै स्पष्टीकरण माग्दा स्पष्ट जवाफ नदिएको अपुर्ण तथा भ्रामक विवरण दिएको आरोप पनि लगाइएको छ ।
रास्वपाले मन्त्री साहको व्यवहार जनअपेक्षा, पार्टीको नीति, सिद्धान्त तथा आचारसंहिताविपरीत भएको निष्कर्ष निकालेको छ । इमान्दार राजनीतिका लागि जनताले दिएको विश्वासमाथि आँच पुग्ने देखिएकाले आवश्यक कारबाही गर्नुपर्ने पत्रमा उल्लेख छ। रास्वपाले ‘राइट टु रिकल’ व्यवस्था प्रयोग गर्दै मन्त्री साहलाई फिर्ता बोलाएको हो । उनी १३ दिनअघि मात्र मन्त्रीमा नियुक्त भएका थिए ।
हटाइएका साह महोत्तरी-२ बाट प्रत्यक्ष निर्वाचित सांसद हुन साथै पत्रमार्फत स्वास्थ्य तथा जनसंख्या मन्त्री निशा मेहतालाई समेत यस विषयमा सचेत गराउन सिफारिस गरिएको छ ।
