काठमाडौँ, १३ चैत २०८२ – नेपालमा नयाँ राजनीतिक अध्याय सुरु भएको छ । राष्ट्रिय स्वतन्त्र पार्टी (रास्वपा) का बरिष्ठ नेता बालेन्द्र शाह (बालेन) ले आज राष्ट्रपति भवन शीतलनिवासमा आयोजित विशेष समारोहबीच प्रधानमन्त्री पद तथा गोपनीयताको सपथ लिएका छन् ।
राष्ट्रपति रामचन्द्र पौडेल ले संविधानको धारा ७६(१) अनुसार शाहलाई प्रधानमन्त्रीमा नियुक्त गर्दै सपथ गराएका हुन् । यससँगै शाह नेपालको नयाँ प्रधानमन्त्री बनेका छन्, जो पछिल्लो समयको सबैभन्दा युवा प्रधानमन्त्रीसमेत हुन् ।
शीतलनिवासमा आयोजित सपथग्रहण समारोह वैदिक तथा बौद्ध परम्परा अनुसार सम्पन्न गरिएको थियो । कार्यक्रममा बटुकद्वारा स्वस्तिवाचन, बौद्ध भिक्षुद्वारा मंगलपाठ तथा नेपाली सेनाबाट सम्मान सलामी दिइएको थियो ।
उक्त समारोहमा उपराष्ट्रपति, प्रधानन्यायाधीश, विभिन्न राजनीतिक दलका शीर्ष नेताहरू, कूटनीतिक नियोगका प्रतिनिधि तथा उच्च सरकारी अधिकारीहरूको उपस्थिति रहेको थियो ।
प्रधानमन्त्री शाहसँगै मन्त्री परिषद्का सदस्यहरूले पनि राष्ट्रपति समक्ष सपथ लिएका छन् । नयाँ सरकार सानो आकारको बनाउने लक्ष्यसहित सीमित संख्यामा मन्त्री नियुक्त गरिएको बताइएको छ ।
गत फागुन २१ गते सम्पन्न प्रतिनिधिसभा निर्वाचनमा रास्वपाले २७५ मध्ये १८२ सिट जित्दै स्पष्ट बहुमत हासिल गरेको थियो । सोही आधारमा शाह प्रधानमन्त्री बनेका हुन् ।
यो निर्वाचन जेन जेट युवाहरूको आन्दोलनपछि भएको थियो, जसले पुरानो सरकार परिवर्तन गराएको थियो । शाहको उदयलाई युवा पुस्ताको अपेक्षा र परिवर्तनको प्रतीकका रूपमा हेरिएको छ ।
नवनियुक्त प्रधानमन्त्री शाहसामु सुशासन, रोजगारी सिर्जना, भ्रष्टाचार नियन्त्रण र राजनीतिक स्थायित्व कायम गर्ने चुनौतीहरू छन् । साथै, आन्दोलनका माग सम्बोधन गर्ने दायित्व पनि उनको काँधमा आएको छ।
बालेन्द्र शाहको सपथसँगै नेपालमा नयाँ नेतृत्वको सुरुवात भएको छ । युवा नेतृत्व, स्पष्ट बहुमत र जनअपेक्षाको दबाबबीच अबको सरकारको कामकारबाहीलाई देशले नजिकबाट हेरिरहेको छ ।