धनगढी : सुदूरपश्चिम प्रदेशका नवनियुक्त सामाजिक विकास मन्त्री बेलबहादुर रानाले पदभार सम्हालेसँगै स्वास्थ्य क्षेत्रलाई प्राथमिकतामा राख्दै आफ्नो पहिलो निर्णय सार्वजनिक गरेका छन्। उनले प्रदेशभर कार्यरत मेडिकल अधिकृत र आयुर्वेद चिकित्सकका लागि आधारभूत अल्ट्रासाउन्ड सेवासम्बन्धी तालिम सञ्चालन गर्न आवश्यक पाठ्यक्रम स्वीकृत गर्ने निर्णय गरेका हुन्।
मन्त्रालयका अनुसार यस कार्यक्रममार्फत चिकित्सकहरूको व्यावसायिक क्षमता अभिवृद्धि गर्दै दुर्गम तथा ग्रामीण क्षेत्रमा समेत आधारभूत अल्ट्रासाउन्ड सेवा विस्तार गर्ने लक्ष्य लिइएको छ। यसले स्थानीय स्वास्थ्य संस्थाबाटै प्रारम्भिक स्वास्थ्य परीक्षण सहज बनाउन सहयोग पुग्ने विश्वास गरिएको छ।
विशेषगरी गर्भवती महिलाको नियमित स्वास्थ्य परीक्षण, पेटसम्बन्धी समस्या तथा अन्य प्रारम्भिक अवस्थाको पहिचानमा अल्ट्रासाउन्ड सेवाको प्रभावकारी उपयोग बढ्ने अपेक्षा गरिएको मन्त्रालयले जनाएको छ। स्वास्थ्यकर्मीलाई थप सीपयुक्त बनाउने उद्देश्यसहित तालिम कार्यक्रम अघि बढाइएको पनि उल्लेख गरिएको छ।
तालिम सम्पन्न भएपछि प्रदेशका अस्पताल र स्वास्थ्य संस्थामा सेवा प्रवाह थप प्रभावकारी हुने तथा सर्वसाधारणले आफ्नै स्थानीय तह नजिकै छिटो र सहज रूपमा आवश्यक सेवा पाउने अपेक्षा गरिएको छ।
मन्त्री रानाले पदभार ग्रहण गरेको पहिलो दिन नै स्वास्थ्य सेवाको गुणस्तर र पहुँच सुधारलाई केन्द्रमा राखेर यस्तो निर्णय लिएको भन्दै मन्त्रालयले यसलाई प्रदेशको स्वास्थ्य प्रणाली सुदृढीकरणतर्फको महत्वपूर्ण सुरुआती पहलका रूपमा व्याख्या गरेको छ।
