दोधारा चाँदनी – निर्माण व्यवसायी संघ कञ्चनपुरको प्रेस सल्लाहकार पदमा पत्रकार भुपी उपाध्याय नियुक्त भएका छन्। संघको २०८२ साल पौष ०५ गते बसेको कार्यसमितिको बैठकबाट पारित निर्णयअनुसार १५ औँ कार्यसमितिको सम्पूर्ण कार्यकालका लागि उनलाई उक्त जिम्मेवारी प्रदान गरिएको हो। निर्माण व्यवसाय र सञ्चार क्षेत्रबीचको सम्बन्धलाई थप व्यवस्थित, पारदर्शी र प्रभावकारी बनाउने उद्देश्यसहित गरिएको यो नियुक्तिलाई संघले महत्त्वपूर्ण निर्णयका रूपमा लिएको छ। निर्माण व्यवसायी संघ कञ्चनपुरको नियमित कार्यसमितिको बैठकमा निर्माण व्यवसायमा देखिएका समसामयिक चुनौती, नीतिगत समस्या, भुक्तानी ढिलाइ, अनुगमनसम्बन्धी जटिलता र सञ्चार व्यवस्थापनका विषयमा विस्तृत छलफल गरिएको थियो। पछिल्लो समय निर्माण व्यवसायसम्बन्धी विषयमा अपूर्ण सूचना र भ्रम फैलिँदा व्यवसायीहरू प्रभावित हुँदै आएको निष्कर्ष निकाल्दै अनुभवी सञ्चारकर्मीलाई प्रेस सल्लाहकार नियुक्त गर्नु आवश्यक रहेको ठहर गरिएको हो। सोही निर्णयअनुसार पत्रकारिता क्षेत्रमा लामो अनुभव र विश्वासिलो छवि बनाएका भुपी उपाध्यायलाई प्रेस सल्लाहकार पदमा नियुक्त गरिएको हो। संघका महासचिव देवीदत्त भट्टको सिग्नेचर सहित उपाध्यायलाई औपचारिक नियुक्ति पत्र प्रदान गरिएको छ। नियुक्ति पत्रमा प्रेस सल्लाहकारको हैसियतले संघ र सञ्चार माध्यमबीच समन्वय गर्ने, सङ्घका निर्णय, कार्यक्रम तथा गतिविधिलाई तथ्यपरक र सन्तुलित ढङ्गले सार्वजनिक गर्न सहयोग गर्ने, साथै आवश्यक पर्दा सञ्चार रणनीतिका विषयमा परामर्श दिने जिम्मेवारी उल्लेख गरिएको छ। उनले १५ औँ कार्यसमितिको सम्पूर्ण कार्यकाल भरि उक्त जिम्मेवारी निर्वाह गर्नेछन्। भूपी उपाध्याय लामो समयदेखि पत्रकारिता पेशामा सक्रिय रहँदै आएका अनुभवी पत्रकार हुन्। उनले विकास निर्माण, सार्वजनिक सरोकार, सुशासन, सामाजिक न्याय र प्रशासनिक उत्तरदायित्वजस्ता विषयमा निरन्तर कलम चलाउँदै आएका छन्। निष्पक्षता, तथ्यपरकता र जिम्मेवारीपूर्ण पत्रकारिताका कारण उनी सञ्चार क्षेत्रका विश्वासिला व्यक्तित्वका रूपमा परिचित छन्। हाल उपाध्याय त्रिनेत्र पोस्टका सञ्चालकका रूपमा कार्यरत छन् भने पश्चिम आजको सम्पादकको जिम्मेवारी समेत सम्हालिरहेका छन्। निर्माण व्यवसायी संघ कञ्चनपुरका पदाधिकारीहरूका अनुसार निर्माण व्यवसाय विकास निर्माणको मेरुदण्ड हो। सडक, पुल, भवन, खानेपानी, सिँचाइ जस्ता पूर्वाधार निर्माणमा व्यवसायीहरूको योगदान महत्त्वपूर्ण भए पनि नीतिगत अस्पष्टता, कानुनी जटिलता र भुक्तानी समस्याले व्यवसायीहरू समस्यामा पर्दै आएका छन्। यस्ता अवस्थामा सञ्चार माध्यममार्फत सही सूचना प्रवाह र वास्तविक समस्या सार्वजनिक गर्न प्रेस सल्लाहकारको भूमिका अत्यन्त आवश्यक हुने संघको बुझाइ छ। नियुक्तिपछि प्रतिक्रिया दिँदै भूपी उपाध्यायले आफूलाई दिइएको जिम्मेवारीलाई गम्भीरतापूर्वक लिएको बताएका छन्। उनले सत्य, तथ्य र सन्तुलनलाई प्राथमिकतामा राख्दै संघ र सञ्चार माध्यमबीच स्वस्थ सम्बन्ध कायम गर्न आफ्नो भूमिका इमानदारीका साथ निर्वाह गर्ने प्रतिबद्धता जनाएका छन्। निर्माण व्यवसाय विकाससँग प्रत्यक्ष जोडिएको क्षेत्र भएकाले यसका समस्या र योगदानलाई निष्पक्ष रूपमा सार्वजनिक गर्नु आवश्यक रहेको उनको भनाइ छ। निर्माण व्यवसायी संघ कञ्चनपुर जिल्लाका निर्माण व्यवसायीहरूको साझा संस्था हो। संघले व्यवसायीहरूको हकहित संरक्षण, क्षमता विकास, नीति निर्माणमा सुझाव तथा सरकारी निकायसँग समन्वय गर्दै निर्माण क्षेत्रका समस्या समाधानका लागि निरन्तर पहल गर्दै आएको छ। भूपी उपाध्यायको प्रेस सल्लाहकारमा नियुक्तिसँगै संघको सञ्चार व्यवस्थापन थप व्यवस्थित, पारदर्शी र प्रभावकारी हुने अपेक्षा गरिएको छ।