कोहलपुर, बाँके । कोहलपुर नगरपालिकाले २२ औँ राष्ट्रिय धान दिवस तथा रोपाइँ महोत्सव-२०८३ को अवसरमा विशेष कार्यक्रम आयोजना गर्ने भएको छ । नगरपालिकाले एक सुचना जारी गर्दै कृषि क्षेत्रसँग सम्बन्धित सरोकारवाला निकाय, जनप्रतिनिधि, कर्मचारी तथा सञ्चारकर्मीलाई कार्यक्रममा सहभागी हुन अनुरोध गरेको हो । नगरपालिकाका प्रमुख प्रशासकीय अधिकृतद्वारा जारी सुचनाअनुसार “धान बालीको प्रवर्द्धन, खाद्य आत्मनिर्भरता र समृद्धि” भन्ने मुल नारासहित राष्ट्रिय धान दिवस मनाउन लागिएको हो ।
कार्यक्रम असार १५ गते बिहान ६ बजे कोहलपुर नगरपालिका वडा नं. १५ मा सञ्चालन गरिने जनाइएको छ । कार्यक्रममा नगर प्रमुख, उपप्रमुख, वडा अध्यक्षहरू, कार्यपालिका सदस्य, कृषि तथा सहकारी क्षेत्रका प्रतिनिधि, विभिन्न संघसंस्था तथा सञ्चारकर्मीहरूको सहभागिता रहने अपेक्षा गरिएको छ । नगरपालिकाले कार्यक्रमलाई सफल बनाउन वडा नं. १५ को वडा कार्यालय, महिला तथा पुरुष कृषक समूह लगायत सम्बन्धित पक्षलाई आवश्यक समन्वय र सहजीकरण गर्न निर्देशन दिएको छ ।
राष्ट्रिय धान दिवसको अवसरमा हुने रोपाइँ महोत्सवले कृषि उत्पादन वृद्धि, धान खेतीप्रति आकर्षण बढाउने तथा कृषकहरूको योगदानको सम्मान गर्ने उद्देश्य राखेको नगरपालिकाले जनाएको छ ।
