भक्तपुर, असार ९ – भक्तपुर नगरपालिका-१ नगरकोटमोडमा चक्कु प्रहारबाट गम्भीर घाइते भएका एक युवकको उपचारका क्रममा मृत्यु भएको छ। घटनामा संलग्न रहेको आरोपमा प्रहरीले तीन जनालाई पक्राउ गरेको छ ।
प्रहरीका अनुसार महोत्तरीको मिथिला नगरपालिका-९ घर भई हाल भक्तपुर नगरपालिका-१ नगरकोटमोड बस्दै आएका २८ वर्षीय आकाश रसाईलीमाथि धारिलो हतियार (चक्कु) प्रहार गरिएको थियो । घटनामा गम्भीर घाइते भएका रसाईलीलाई उपचारका लागि केएमसी अस्पताल, सिनामंगल लगिएको थियो । उपचारकै क्रममा मंगलबार बिहान उनको मृत्यु भएको प्रहरीले जनाएको छ ।
हत्या आरोपमा पक्राउ पर्नेहरूमा भक्तपुर सल्लाघारी बस्दै आएका उदयपुर घरका ३१ वर्षीय आयष कार्की, झापा घरका २७ वर्षीय दोर्जे शेर्पा र गुल्मी घरका ३५ वर्षीय रमेश कुवँर रहेका छन ।
घटनाको सूचना प्राप्त हुनासाथ प्रहरी प्रभाग दुधपाटीबाट खटिएको टोलीले उनीहरूलाई नियन्त्रणमा लिएको थियो ।
घटनाको कारण र अन्य विवरण खुल्न बाँकी रहेको भन्दै प्रहरीले यस सम्बन्धमा थप अनुसन्धान जारी रहेको जनाएको छ ।
