काठमाडौं, साउन १२ – त्रिभुवन विश्वविद्यालयको एमबीएस प्रथम सेमेस्टरको परीक्षाको प्रश्नपत्र वाट्सएप समुहमार्फत सार्वजनिक गरेको आरोपमा प्रहरीले थप दुई जनालाई पक्राउ गरेको छ ।
प्रहरीका अनुसार शिक्षा ऐन, २०२८ अन्तर्गत कसुरमा संलग्न रहेको अभियोगमा पक्राउ पर्नेहरूमा रौतहट राजदेवी नगरपालिका-४ निवासी २५ वर्षीय अतुल कुमार मिश्र र पर्सा वीरगञ्ज महानगरपालिका-२१ बस्ने बारा घर भएका ३१ वर्षीय अब्दुल सानि हाकिम रहेका छन ।
केन्द्रीय अनुसन्धान ब्युरो (सीआईबी) काठमाडौंको टोलीले अतुललाई आइतबार काठमाडौं महानगरपालिका-१३ ताहाचलबाट पक्राउ गरेको हो भने अब्दुललाई सोमबार पर्साको वीरगञ्ज महानगरपालिका-८ बाट नियन्त्रणमा लिएको प्रहरीले जनाएको छ ।
प्रारम्भिक अनुसन्धानका क्रममा उनीहरूले गत साउन ८ गते सञ्चालन भएको त्रिभुवन विश्वविद्यालय, व्यवस्थापन सङ्कायअन्तर्गत एमबीएस प्रथम सेमेस्टरको MGT 515: Organizational Behaviour विषयको प्रश्नपत्र विभिन्न वाट्सएप समुहमा साझा गरेको खुलेको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
