१९ पुस, कोहलपुर । कोहलपुर महोत्सवको अवधि पाँच दिन थप गरिएको छ। महोत्सवप्रति दर्शकको उल्लेखनीय आकर्षण तथा व्यवसायीहरूको मागलाई मध्यनजर गर्दै पुष ९ गतेदेखि १८ गतेसम्म सञ्चालन हुने भनिएको महोत्सव अब पुष २५ गतेसम्म सञ्चालन हुने भएको हो।

महोत्सव सञ्चालनको दशौँ दिनसम्म पनि स्थानीय तथा बाह्य दर्शकहरूको उत्साहजनक सहभागिता कायमै रहेपछि स्थानीय सरकारसँगको समन्वयमा अवधि थप गर्ने निर्णय गरिएको कोहलपुर महोत्सव मूल आयोजक समितिका संयोजक प्रदीप भट्टराईले जानकारी दिए । अब महोत्सवको औपचारिक समापन पुष २५ गते हुने उनले बताए ।

विद्यालयस्तरीय सामूहिक नृत्य प्रतियोगितामा गोरखा स्कुल प्रथम

कोहलपुर महोत्सवअन्तर्गत आयोजित विद्यालयस्तरीय सामूहिक नृत्य प्रतियोगितामा गोरखा स्कुल प्रथम भएको छ। शुक्रबार सम्पन्न फाइनल चरणमा ६ वटा विद्यालयलाई पछि पार्दै गोरखा स्कुल विजयी भएको हो।

त्यसैगरी, कोहलपुरकै निम्बल स्कुल द्वितीय र ज्ञानज्योति माध्यमिक विद्यालय तृतीय हुन सफल भएका छन्। विजेता विद्यालयहरूले क्रमशः रु. ५० हजार, रु. ३० हजार र रु. २० हजार नगद पुरस्कारसहित प्रमाणपत्र प्राप्त गरेका थिए। प्रतियोगितामा वेस्टर्न स्कुल सान्त्वना घोषित भएको थियो।

विजेता तथा सहभागी टिमहरूलाई महोत्सव मूल आयोजक समितिका संयोजक प्रदीप भट्टराईले पुरस्कार तथा प्रमाणपत्र वितरण गरेका थिए ।

चक्र बम र रचना रिमालले दर्शक झुमाए

महोत्सवको दशौँ दिन चर्चित गायक चक्र बम र लोकप्रिय गायिका रचना रिमाल लगायतका कलाकारहरूको प्रस्तुतीले महोत्सवस्थल दर्शकले खचाखच भरिएको थियो। चक्र बमले डेउडा गीतमार्फत दर्शकलाई नचाउँदा रचना रिमालले आफ्ना लोकप्रिय गीतहरू प्रस्तुत गर्दै माहोललाई थप उत्साहपूर्ण बनाएकी थिइन्।

त्यसैगरी, आकस्मिक रूपमा महोत्सवमा उपस्थित भएका चर्चित हास्यव्यंग्य कलाकार राजा राजेन्द्र पोखरेलले दर्शकलाई हाँस्न बाध्य बनाएका थिए। चर्चित मोडल करिश्मा शाही तथा स्थानीय कलाकारहरूको प्रस्तुतिले समेत दर्शकलाई भरपूर मनोरञ्जन प्रदान गरेको थियो।

शनिबार बद्रि पंगेनी र प्रीती आले आउने

महोत्सवको ११औँ दिन शनिबार चर्चित गायक बद्री पंगेनी, गायिका प्रीती आले, यम टि महर र मोडल टिका जैशी लगायतका कलाकारहरूको प्रस्तुति रहनेछ । साथै स्थानीय कलाकारहरूको समेत प्रस्तुति रहने कला, संस्कृति तथा अतिथि सत्कार उप–समितिका संयोजक चण्डी प्रसाद गैरेले जानकारी दिए ।