पुष ७, बाँके । प्रहरीले देशका विभिन्न जिल्लामा आइतबार सञ्चालन गरेको विशेष चेकजाँच तथा अनुसन्धानका क्रममा अवैध तथा नियन्त्रित लागूऔषधसहित २० जनालाई पक्राउ गरेको छ।

नवलपरासी पूर्वको गैंडाकोट नगरपालिका–७ गैरीबाट अवैध लागूऔषध गाँजा करिब १ किलोग्राम, नियन्त्रित लागूऔषध ट्रामाडोल ३७० ट्याब्लेट, एनार्गन २७० ट्याब्लेट, भोमिन १०० ट्याब्लेट तथा नगद १० हजार ९५० रुपैयाँसहित २८ वर्षीय सुरज भट्टराईलाई प्रहरीले पक्राउ गरेको छ। इलाका प्रहरी कार्यालय गैंडाकोटबाट खटिएको प्रहरी टोलीले उनलाई दिउँसो पक्राउ गरेको हो।

त्यस्तै, रूपन्देहीको लुम्बिनी सांस्कृतिक नगरपालिका–१३ कालिदहबाट नियन्त्रित लागूऔषध स्पास १२० ट्याब्लेटसहित सोही नगरपालिका–१० का २५ वर्षीय कृपा शंकर उपाध्याय पक्राउ परेका छन्। इलाका प्रहरी कार्यालय लुम्बिनीबाट खटिएको टोलीले उनलाई नियन्त्रणमा लिएको हो।

कञ्चनपुरको बेलौरी नगरपालिका–६ नकैयाबाट अवैध लागूऔषध खैरो हेरोइनजस्तो देखिने पदार्थ १ ग्राम ८७० मिलिग्रामसहित दुई जना पक्राउ परेका छन्। पक्राउ पर्नेमा २७ वर्षीय मोहन ऐर र २८ वर्षीय मुकुन्द जोशी रहेका छन्। भारतबाट साइकलमा नेपालतर्फ आउँदै गर्दा इलाका प्रहरी कार्यालय बेलौरीबाट खटिएको टोलीले उनीहरूलाई पक्राउ गरेको हो।

बाँकेको बैजनाथ गाउँपालिका–५ जि गाउँका २७ वर्षीय तिलक राना मगरलाई अवैध लागूऔषध ब्राउनसुगरजस्तो देखिने पदार्थ १९० मिलिग्रामसहित प्रहरीले आइतबार राति पक्राउ गरेको छ। प्रहरी बिट जि गाउँबाट खटिएको टोलीले घर तलासीका क्रममा उक्त पदार्थ फेला पारेको हो।

यसैगरी, बाँकेकै खजुरा गाउँपालिका–१ बाट ब्राउनसुगरजस्तो देखिने पदार्थ १ ग्राम ७९० मिलिग्रामसहित २८ वर्षीय सिताराम विक पक्राउ परेका छन्। तुलप्रसाद थापाको घर तलासीका क्रममा लागूऔषध फेला परेको र हाल फरार रहेका तुलप्रसाद थापाको खोजी भइरहेको प्रहरीले जनाएको छ।

दाङको लमही नगरपालिका–५ लमही बसपार्कबाट ब्राउनसुगरजस्तो देखिने पदार्थ १३ ग्राम २९० मिलिग्रामसहित २६ वर्षीय सुजन परियार पक्राउ परेका छन्। थप अनुसन्धानका क्रममा लागूऔषध कारोबारमा संलग्न रहेको आरोपमा २७ वर्षीय विवेक बुढामगर र २८ वर्षीय विकास पुन मगरलाई घोराही उपमहानगरपालिका–१४ बाट पक्राउ गरिएको प्रहरीले जनाएको छ।

त्यस्तै, दाङकै राप्ती गाउँपालिका–५ कालापानीबाट ब्राउनसुगरजस्तो देखिने पदार्थ ३१ ग्राम १६० मिलिग्रामसहित दुई जना पक्राउ परेका छन्। पक्राउ पर्नेमा ३८ वर्षीय इमरान सिद्दिकी हलवाई र ३८ वर्षीय नुरुद्दिन अन्सारी रहेका छन्।

मकवानपुरको इन्द्रसरोवर गाउँपालिका–२ सिमखोलाबाट नियन्त्रित लागूऔषध नाइट्राजेपाम २०० ट्याब्लेटसहित २३ वर्षीय महफुल आलमसहित दुई जनालाई प्रहरीले पक्राउ गरेको छ। मोटरसाइकल जाँचका क्रममा उनीहरूलाई नियन्त्रणमा लिइएको हो।

महोत्तरीको औरही नगरपालिका–१ बाट डाइजेपाम ४७४ एम्पुल, बुप्रेनोर्फिन ४८४ एम्पुल र प्रोमेथाजाइन ४७८ एम्पुलसहित २१ वर्षीय शेष तनबिरसहित चार जना पक्राउ परेका छन्।

मोरङको बुढीगंगा गाउँपालिका–२ शिवम पेट्रोल पम्प नजिकैबाट ट्रामाडोल ४०० ट्याब्लेट र डाइक्लोमाइन ४५० ट्याब्लेटसहित २८ वर्षीय सुजन तामाङसहित तीन जना पक्राउ परेका छन्।

यस सम्बन्धमा प्रहरीले थप अनुसन्धान गरिरहेको जनाएको छ।