काठमाडौं, ४ चैत – पुष्पकमल दाहाल प्रचण्ड लगायत शीर्ष नेताहरूले प्रधानमन्त्री सुशीला कार्की को प्रशंसा गरे पनि बालुवाटारमा भएको भेटघाटले देशको समसामयिक राजनीतिमा नयाँ बहस सुरु गरेको छ ।
प्रधानमन्त्रीको सरकारी निवास बालुवाटारमा बुधबार बिहान भएको भेटमा माधवकुमार नेपाल, नारायणकाजी श्रेष्ठ, वर्षमान पुन लगायतका नेताहरू सहभागी थिए । भेटमा प्रतिनिधिसभा निर्वाचन र पछिल्लो राजनीतिक अवस्थाबारे छलफल भएको बताइएको छ ।
प्रधानमन्त्री कार्कीले निर्वाचन सफल बनाउन नेताहरूले खेलेको भूमिकाको प्रशंसा गर्दै लोकतान्त्रिक प्रक्रियालाई सुदृढ बनाउन सबैको सहकार्य आवश्यक रहेको बताइन । उनले निर्वाचनमा सहभागी सबै दल तथा नेताहरूलाई धन्यवाद दिँदै परिणामलाई स्वीकार गरेर अघि बढ्न आग्रह गरिन ।
तर, विश्लेषकहरूले भने यो भेटलाई केवल औपचारिक धन्यवाद आदानप्रदानभन्दा बढी अर्थपूर्ण रूपमा हेरिरहेका छन । हालको राजनीतिक सन्तुलन, आगामी सत्ता समीकरण र नेतृत्वबीचको सम्बन्ध सुधारको संकेतका रूपमा पनि यसलाई व्याख्या गर्न थालिएको छ ।
प्रचण्डले निर्वाचन नभएको भए मुलुक गम्भीर संकटमा पर्न सक्ने उल्लेख गर्दै प्रधानमन्त्री कार्कीको नेतृत्वलाई ‘निर्णायक’ भने । उनले आफ्नो पार्टी सुरुदेखि नै निर्वाचनको पक्षमा उभिएको दाबी दोहोर्याए ।
त्यस्तै, माधवकुमार नेपालले कार्की प्रधानमन्त्री बन्ने सम्भावनाले त्यतिबेला राजनीतिक वृत्तमा आशा जगाएको स्मरण गर्दै वर्तमान उपलब्धिलाई स्थायित्व दिन थप सहकार्य आवश्यक रहेको औंल्याए ।
यद्यपि, केही राजनीतिक वृत्तले भने नेताहरूको यस्तो प्रशंसालाई आगामी शक्ति बाँडफाँट र गठबन्धनको संकेतका रूपमा पनि हेरेका छन । निर्वाचनपछि देखिएको नयाँ शक्ति सन्तुलनले सरकार गठन र नीति निर्माणमा कस्तो प्रभाव पार्ने भन्ने प्रश्न अझै खुला नै छ ।
