साउन १४ काेहलपुर, बाँके । राजसंस्था पुनर्स्थापनाको माग गर्दै कोहलपुरको न्युरोड क्षेत्रमा हस्ताक्षर संकलन अभियान सञ्चालन गरिएको छ । शाही युवा शक्ति नेपालको आयोजनामा सुरु गरिएको उक्त अभियानमा स्थानीय नागरिकहरूको सहभागिता बढ्दै गएको आयोजकले जनाएको छ ।
राप्रपाका युवा नेता तथा सन २०२१ देखि शाही युवा शक्ति नेपालको अभियानमा सक्रिय रहेका कोहलपुरका अर्जुन जंग शाहको नेतृत्वमा हस्ताक्षर संकलन कार्यक्रम सञ्चालन भइरहेको हो । अभियानमार्फत राजसंस्था पुनर्स्थापनाका पक्षमा जनमत संकलन गर्ने उद्देश्य रहेको आयोजकको भनाइ छ ।
अभियानस्थलमा राखिएको ब्यानरमा “राजाको पक्षमा जनताको हस्ताक्षर अभियान-२०८३ मा सहभागी बनौँ” भन्ने आह्वान गरिएको छ । साथै “राष्ट्रपति होइन राजा चाहिन्छ” भन्ने नारासहित नागरिकहरूलाई हस्ताक्षर गर्न अनुरोध गरिएको देखिन्छ । ब्यानरमा पुर्वराजा ज्ञानेन्द्र शाहको तस्वीर समेत राखिएको छ ।
आयोजक अर्जुन जंग शाहले देशमा बढ्दो राजनीतिक अस्थिरता, भ्रष्टाचार र जनतामा बढ्दो निराशाका कारण राजसंस्थाको आवश्यकता महसुस गरिएको दाबी गर्दै हस्ताक्षर अभियान सञ्चालन गरिएको बताए । उनले अभियानबाट संकलित हस्ताक्षर सम्बन्धित निकायमा बुझाइने जानकारी दिए ।
कोहलपुरको व्यस्त बजार क्षेत्र न्युरोडमा सञ्चालन भइरहेको अभियानप्रति केही नागरिकले समर्थन जनाउँदै हस्ताक्षर गरेका छन भने केहीले फरक राजनीतिक धारणा पनि व्यक्त गरेका छन ।
शाही युवा शक्ति नेपालले आगामी दिनमा बाँकेका अन्य स्थानमा समेत यस्तै जनमत संकलन कार्यक्रम सञ्चालन गर्ने जनाएको छ ।
