नेपालगन्ज, बाँके । फलोअप उपचारका लागि आफैं स्कुटर चलाएर अस्पताल पुगेकी ३५ वर्षीया शिला श्रेष्ठको उपचारका क्रममा मृत्यु भएपछि नेपालगन्जस्थित केयर सिटी अस्पतालमा तनाव उत्पन्न भएको छ । मृतकका आफन्त तथा परिवारजनले अस्पतालको लापरबाहीका कारण शिलाको मृत्यु भएको आरोप लगाउँदै निष्पक्ष छानबिन र दोषीमाथि कारबाहीको माग गरेका छन ।
परिवारका अनुसार शिला श्रेष्ठको स्वास्थ्य अवस्था सामान्य रहेको अवस्थामा फलोअप उपचारका लागि अस्पताल पुगेकी थिइन तर उपचारकै क्रममा अचानक उनको मृत्यु भएपछि परिवार स्तब्ध बनेको छ । घटनापछि अस्पताल परिसरमा आफन्तहरू आक्रोशित बनेका छन् भने न्याय नपाएसम्म शव नउठाउने अडान लिएका छन ।
मृतकका आफन्तहरूले चिकित्सक तथा अस्पताल प्रशासनको लापरबाहीका कारण शिलाको ज्यान गएको दाबी गर्दै जिल्ला प्रशासन कार्यालय बाँके र जिल्ला प्रहरी कार्यालय बाँकेमा चिकित्सकविरुद्ध किटानी जाहेरी दर्ता गराएका छन । उनीहरूले घटनाको सत्यतथ्य बाहिर ल्याउन निष्पक्ष र स्वतन्त्र छानबिन समिति गठन गर्न माग गरेका छन ।
यसैबीच, केयर सिटी अस्पतालले घटनाबारे प्रेस विज्ञप्ति जारी गर्दै आफ्नो धारणा सार्वजनिक गरेको छ । तर अस्पतालले विज्ञप्तिमा उल्लेख गरेका केही विवरणहरू तथ्यसँग नमिलेको भन्दै पीडित पक्षले उक्त विज्ञप्ति अस्वीकार गरेको छ । परिवारजनले अस्पतालले वास्तविक घटना ढाकछोप गर्ने प्रयास गरेको आरोप लगाएका छन ।
आफन्तहरूको भनाइ अनुसार अस्पतालको विज्ञप्तिमा प्रस्तुत गरिएको विवरण र घटनाको वास्तविक अवस्था बीच ठूलो अन्तर रहेको छ । “अस्पतालले सत्य लुकाउन खोजेको छ, हामी निष्पक्ष छानबिन र न्याय चाहन्छौं,” एक आफन्तले बताए ।
घटनापछि जिल्ला प्रशासन कार्यालय बाँकेमा पीडित पक्ष र सम्बन्धित निकायबीच छलफल भइ जाहेरी दर्ता प्रक्रिया अघि बढेको छ । प्रशासनले घटनाबारे आवश्यक अनुसन्धान अघि बढाइने जनाएको छ भने प्रहरीले पनि जाहेरीका आधारमा अनुसन्धान प्रक्रिया सुरु गरेको जनाएको छ ।
शिला श्रेष्ठको मृत्युले स्थानीयस्तरमा स्वास्थ्य संस्थाको सेवा, जिम्मेवारी र उपचार प्रक्रियामाथि गम्भीर प्रश्न उठाएको छ । घटनाको निष्पक्ष छानबिन गरी सत्य तथ्य सार्वजनिक गर्न तथा दोषी देखिए कानुनी कारबाही गर्न स्थानीयवासी तथा विभिन्न सरोकारवालाहरूले माग गरेका छन ।
पीडित परिवारले भने स्पष्ट रूपमा आफ्नो माग दोहोर्याएका छन – “निष्पक्ष छानबिन होस्, दोषीलाई कारबाही होस्, न्याय नपाउँदासम्म शव उठाइने छैन ।”