काठमाडौं, जेठ १८ – नेपाल प्रहरीले देशका विभिन्न जिल्लाबाट अवैध तथा नियन्त्रित लागूऔषधसहित २० जनालाई पक्राउ गरेको छ ।
प्रहरीका अनुसार झापाको मेचीनगरबाट खैरो हेरोइनजस्तो पदार्थसहित दुई जना पक्राउ परेका छन । मेचीनगर-६ बाट २ ग्राम २५० मिलिग्राम खैरो हेरोइनसहित ३२ वर्षीय विश्वनाथ राजवंशी पक्राउ परेका हुन भने सोही क्षेत्रबाट ४८ ग्राम ६० मिलिग्राम खैरो हेरोइनजस्तो पदार्थ र नगद ८ हजार रुपैयाँसहित काठमाडौंका ३२ वर्षीय रोशन कार्कीलाई नियन्त्रणमा लिइएको छ ।
दाङको घोराही उपमहानगरपालिका-१४ बाट ट्रामाडोल २० ट्याब्लेट र नगद ६ हजार ६ सय रुपैयाँसहित २ जना पक्राउ परेका छन । रसुवाको उत्तरगया गाउँपालिका-२ बाट ट्रामाडोल १७ ट्याब्लेटसहित २४ वर्षीय दिनेश तामाङ पक्राउ परेका छन ।
मकवानपुरको हेटौंडा-१५ रातोमाटेबाट करिब ३४ ग्राम ७९० मिलिग्राम खैरो हेरोइनजस्तो पदार्थसहित तीन जना पक्राउ परेका छन । उनीहरू बोलेरो गाडीमा सवार अवस्थामा पक्राउ परेका थिए ।
सुनसरीमा लागूऔषध नियन्त्रण अभियानअन्तर्गत तीन फरक घटनामा तीन जना पक्राउ परेका छन । इटहरीबाट १ ग्राम ५४० मिलिग्राम ब्राउनसुगरसहित २९ वर्षीय अभिषेक चौधरी पक्राउ परेका छन । इनरुवाबाट ५ ग्राम ५५० मिलिग्राम ब्राउनसुगरसहित १७ वर्षीय किशोर पक्राउ परेका छन् भने इटहरी-११ बाट ट्रामाडोल ९८० ट्याब्लेट र डाइक्लोमाइन १ हजार १८० ट्याब्लेटसहित २० वर्षीय अभिषेक श्रेष्ठ पक्राउ परेका छन ।
पर्साको जिराभवानी गाउँपालिका-४ बाट नाइट्राजेपाम २६ ट्याब्लेटसहित २४ वर्षीय मन्दिप राउत कुर्मी पक्राउ परेका छन । सिराहाको सिरहा नगरपालिका-१५ बाट ३ ग्राम १४ मिलिग्राम ब्राउनसुगरसहित दुई जना पक्राउ परेका छन ।
जुम्लाको चन्दननाथ नगरपालिका-५ स्थित तिला नदी किनारबाट ब्राउनसुगरजस्तो पदार्थसहित चार जना पक्राउ परेका छन भने मोरङको पथरी शनिश्चरे नगरपालिका-६ बाट नाइट्राजेपाम २७ ट्याब्लेटसहित २१ वर्षीय लक्ष्मण चन्द्रवंशी पक्राउ परेका छन ।
त्यसैगरी कैलालीको कैलारी गाउँपालिका-३ बाट २ ग्राम २० मिलिग्राम ब्राउनसुगरजस्तो पदार्थसहित २९ वर्षीय मिमुह चौधरी पक्राउ परेका छन । प्रहरीले सबै घटनामा बरामद लागूऔषध नियन्त्रणमा लिई थप अनुसन्धान भइरहेको जनाएको छ ।
